Seminarın spikeri qismində APFM Komitə üzvü, Dövlət Vergi Xidmətinin Tədris Mərkəzinin Vergi qanunvericiliyinin tədrisi şöbəsinin rəisi Rəşad Əhmədov çıxış etdi. Rəşad müəllim tərəfindən təqdim olunan dərin məzmunlu və praktiki nümunələrlə zəngin çıxış iştirakçılar üçün olduqca faydalı oldu.

APFM olaraq 2026-cı il üçün maarifləndirici tədbirlər planımız olduqca zəngindir. Üzvlərimizin peşəkar inkişafını daim diqqət mərkəzində saxlayırıq.

Növbəti seminar: Beynəlxalq Maliyyə Hesabatları Standartlarında (MHBS) edilən son dəyişikliklər.
Məqsəd: Qlobal standartlara uyğunlaşma və hesabatlılıqda şəffaflığın artırılması.

Dəyərli təqdimatına görə Rəşad Əhmədova və aktiv iştirakına görə bütün üzvlərimizə təşəkkür edirik!

Azərbaycan Professional Maliyyə Menecerləri Assosiasiyası (APFM) ölkəmizdə maliyyə və mühasibatlıq sahəsində standartların yüksəldilməsi, peşəkar mütəxəssislərin yetişdirilməsi və onların nailiyyətlərinin qiymətləndirilməsi istiqamətində növbəti möhtəşəm layihəsini reallaşdırdı. Ənənəvi olaraq keçirilən və böyük maraqla gözlənilən "APFM AWARDS" mükafatlandırma mərasimi bu il də öz sahəsinin ən yaxşılarını bir araya gətirdi.

APFM AWARDS sadəcə bir mükafat deyil; bu, maliyyəçilərin göstərdikləri yüksək peşəkarlığın, etik prinsiplərə sadiqliyin və şəffaflığın rəmzidir. Tədbirin əsas məqsədi: maliyyə və mühasibatlıq peşəsinin nüfuzunu artırmaq, sahə üzrə fərqlənən mütəxəssisləri və qurumları motivasiya etmək, beynəlxalq standartların yerli bazarda tətbiqini stimullaşdırmaqdır.

Tədbirdə dövlət qurumlarının nümayəndələri, akademik dairələr, beynəlxalq tərəfdaşlar  və 200-dən çox korporativ və fərdi üzv iştirak etmişdir.

"Bu mükafat maliyyə sahəsində çalışan mütəxəssislərin məsuliyyətli fəaliyyətinin və peşəkar standartların inkişafına verdikləri töhfələrin bariz göstəricisidir." — Nuriyyə Novruzova, APFM İdarə Heyətinin sədri.

 

 

Tədbirin əsas spikeri Emin Kazımov “Maliyyə və mühasibatlıq çərçivəsində karyera inkişafı: imkanlar, çağırışlar və hədəflər” mövzusunda çıxış etdi. Çıxışında o, tələbələrə maliyyə sahəsində mövcud olan müxtəlif karyera imkanlarını, qarşıya çıxan çağırışları və uğurlu karyera qurmaq üçün strategiyaları ətraflı izah etdi. Emin Kazımov həmçinin real iş təcrübələrindən nümunələr gətirərək tələbələrə praktik məsləhətlər verdi, sualları cavablandırdı və iştirakçıların fərdi maraqlarına uyğun yönləndirmələr etdi.

Tədbirdə APFM-in idarə heyətinin sədri Nuriyyə Novruzova tələbələrə təşkilatın fəaliyyətləri və məqsədləri barədə geniş məlumat verdi. O, APFM-də karyera imkanlarını, təcrübə və inkişaf perspektivlərini ətraflı təqdim etdi. Nuriyyə Novruzova, həmçinin tələbələrin gələcək planlarını necə formalaşdırması və peşəkar bacarıqlarını necə inkişaf etdirməsi barədə tövsiyələr verdi.

Təlim və inkişaf üzrə menecer Gülnarə Qənbərova çıxışında peşəkar inkişafın əhəmiyyətini və tələbələrin təhsil müddətində hansı bacarıqları inkişaf etdirməli olduqlarını detallı şəkildə izah etdi. O, təlim proqramlarının strukturu, praktiki layihələrdə iştirak imkanları və karyera yönümlü bacarıqların artırılması yolları barədə iştirakçılara faydalı məlumatlar təqdim etdi.

Marketinq departamentinin əməkdaşı Vüsalə Məmmədli öz təqdimatında marketinq sahəsində aktual trendləri, FİNANSİST jurnalının fəaliyyəti və praktik marketinq layihələri haqqında məlumatlar bölüşdü. O, həmçinin tələbələrə öz sahələrində bacarıqlarını daha da artırmaqla və gələcəkdə APFM layihələrində iştirak üçün potensial əməkdaşlar olacaqlarını qeyd etdi.

Tədbir interaktiv formatda keçdi, iştirakçılar spikerlərlə birbaşa ünsiyyət qurdu, suallar verdi və sahə üzrə praktiki biliklər əldə etdilər. Görüş həmçinin tələbələr üçün karyera istiqamətində motivasiya mənbəyi oldu və onların gələcək planlarını formalaşdırmaqda faydalı oldu.

APFM olaraq biz tələbələrin peşəkar inkişafını dəstəkləməyə, onları real iş dünyasına hazırlamağa və innovativ layihələrdə iştirak etməyə davam edəcəyik. Belə görüşlər tələbələrin bilik və bacarıqlarını artırmaq, onları sahə üzrə aktual imkanlarla tanış etmək üçün əhəmiyyətli platformadır.

Növbəti belə seminarlar Tərtər, Şəmkir və Gəncə şəhərlərində keçirilib, tədbirlər zamanı iştirakçılara peşəkar mühasib sertifikat proqramı və onun mərhələləri barədə ətraflı məlumat verilib.

Mühasiblərin peşəkar bilik və bacarıqlarının təkmilləşdirilməsi və regionlar üzrə institusional əməkdaşlığın gücləndirilməsi məqsədilə keçirilən seminarlarda mühasibat uçotu və maliyyə hesabatlılığı sahəsində tətbiq olunan müasir mexanizmlər və onların praktiki əhəmiyyəti barədə geniş fikir mübadiləsi aparılıb. Çıxışlar zamanı maliyyə hesabatlarının şəffaflığının təmin olunması, idarəetmədə hesabatlılığın möhkəmləndirilməsi və mühasibat uçotu sahəsində yeni yanaşmaların tətbiqi istiqamətində aktual mövzular qeyd edilib.

Seminarların sonunda iştirakçıların sualları cavablandırılıb, onlara sertifikat proqramı üzrə təlimat, metodik materiallar və peşəkar fəaliyyətlərini dəstəkləyəcək əlavə məlumatlar təqdim olunub.